10 Secreto si Paquilaya kita Puede Esconde Cen

This is a personal finance article that I wrote in Chavacano on how to save money. This is a rehash of an old article that I wrote which won the SINAG: Sun Life's Financial Literacy Digital Journalism Awards in 2014. Hope you enjoy it!

Mucho kanaton el ta'n dificil ajunta cen. Cosa ba el razon por que. Falta ba disciplina el maga gente llega na cen? Diutay ba el de ila sueldo?

Para conmigo masquin diutay el sueldo debe ta puede lang siempre ajunta cen.

Na este video, ay aprende ustedes el de mio maga secreto si paquilaya puede esconde cen.

1. Hace un lista del maga gastos

Bien importante lista todo el de ustedes gastos todo'l dia. Alli ustedes sabe si donde ta guinda el de ustedes cen. Alli tambien ustedes sabe si onde ustedes sobra-sobra ta gasta. Por ejemplo, baka bien grande ustedes ta gasta para come apuera.

2. Lleva baon en vez compra comida afuera

Deberasan, tiene vez makahuya man lleva baon na oficina. Habla 'se sila, ay bien kuripot man kay ta'n baon lang. Pero dejalo lang kanila. No kanila pone atencion. Bien grande kita puede menora na de aton gastos si man baon lang kita.

3. No tanto man add to cart

Bien grande tentacion gayod el maga shopping apps na de aton vida. Tiene vez hende kita ta sabe kay alla ya lang ta guinda el de aton sueldo. Si no puede gayod controla, mas bueno pa gaha man uninstall ya lang con ese maga shopping apps. Entrao tamen aqui el maga promo como ese piso fare. No mas ya abri el maga website onde ta puede mira con este maga promo para evita el tentacion.

4. No tanto come afuera

Hende lang mas bueno para na bolsa si coce lang tu na casa, mas bueno tambien este para na de tuyo salud. No hay man problema si tiene vez tiene vez lang kita come afuera como una vez lang cada mes pero si firme ya lang, ay aumenta gayod 'se na de ustedes gastos cada mes.

5. Acerta man budget

Hace un budget cada mes. Debe segui con el budget. No man sobra y mas bueno si na fin del mes, tiene pa sobra maga 20% del sueldo. 

6. No man debe

Hende bueno man debe si para na lujo lang usa con el cen. No hay problema si man debe tu para capital na negocio, pero si man debe lang para compra aircon, manda man rebond, man vacaccion, compra gadget, mas bueno si esconde anay cen hinay-hinay cada vez recibi sueldo para gasta na lujo.

7. Mas bueno si bulto ya compra

Masquin mas caro, tiene vez barato ta cae na ulihi si bulto-bulto kita ta compra. Por ejemplo, mas barato ta sale si compra shampoo na grande garrafon contra akel na diutay garrafon. 

8. No envidia na vecinos

El maga gente tiene vez ta compra lang sila el un cosa por causa na celos. Por ejemplo, si ya mira sila con el de ila amigo tiene nuevo camisa, quiere tambien sila tiene nuevo camisa. Mucho veces ta compra kita el maga cosa que hende man kita necesita por causa lang na envidia.

9. Necesita kita tiene emergency fund

Cosa ba el emergency fund? Este el cen que ay usa kita si ya quita kanaton na trabajo o ya tiene kita un emergency.

No hay man malo gasta para na lujo. El importante lang, tiene kita sen escondido para si tiene cosa pasa kanaton, hende kita necesita man debe y man samuk na otro gente.

10. No firme envia cen na familia

Tiene vez si ta ayuda kita con el de aton familia, firme ya lang sila kanaton ay pedi cen. Kanaton ya lang sila ay depende. Hende mas sila trabaja o hace esfuerszo para ayuda con el de ila mismo cuerpo. Por eso tiene vez, necesita hace duro con el corazon. Hende lang ese para na bien de tuyo sino para tambien este na bien del de tuyo primo, tio o quen man se pedi'y pedi contigo cen.

No hay man malo ayuda na otro gente pero pone tambien na lugar. Na cine lang el martir firme ta gana na ultimo.

Tu? Cosa tu puede dale maga tips si paquilaya esconde cen?

You can also read other personal finance articles I have written here.

To learn more about the Chavacano language, please visit Bien Chabacano.